រាជធានីភ្នំពេញ ៖ យុវជនម្នាក់បានត្រូវកំលាំងប៉ូលិសប៉ុសិ៍្ដសង្កាត់ដង្កោ ធ្វើការចាប់ខ្លួន បន្ទាប់ពីរូបគេធ្វើសកម្មភាពឡើងតាមជញ្ជាំង រួចចូលតាមបង្អួចទៅចាប់នាងក្រមុំម្នាក់ដែលកំពុងផ្លាស់សំលៀកបំពាក់ នៅលើផ្ទះរំលោភសេពសន្ថវៈរហូតបានសំរេច ហើយព្យាយាមរត់គេចខ្លួនប៉ុន្ដែត្រូវក្រុមគ្រួសារស្ដ្រីរូបនេះប្ដឹងប៉ូលិសឱ្យចាប់ខ្លួនបាន ។ ហេតុការណ៍នេះបានកើតឡើងកាល ពីវេលាម៉ោង៩ព្រឹកថ្ងៃទី១៦ មីនា នៅក្នុងសង្កាត់ដង្កោ ខណ្ឌដង្កោ ។
យុវជនដែលត្រូវចាប់ខ្លួននោះឈ្មោះជួន ប៊ុនធី អាយុ២៤ឆ្នាំ មានទីលំនៅជាប់នឹងផ្ទះនាងក្រមុំរងគ្រោះ ចំណែកឯនាងរងគ្រោះ អាយុ១៨ឆ្នាំ ។ មន្ដ្រីប៉ូលិសមូលដ្ឋានបានឱ្យដឹងថានៅមុនពេលកើតហេតុនាងក្រមុំរងគ្រោះបានអង្គុយនៅក្នុងបន្ទប់ក្រោមផ្ទះតែម្នាក់ឯង ដោយមិនមានក្រុមគ្រួសារនៅជាមួយទេ ឯជនសង្ស័យបានដើរទៅជិតក្នុងបំណងចូលទៅក្នុងបន្ទប់នោះដែរ ។ ខណៈនោះនាងក្រមុំរងគ្រោះបានទាញទ្វារបិទមិនឱ្យចូលទៅឡើយបន្ទាប់មកជននេះបានស្រែកឱ្យនាងបើកទ្វារប៉ុន្ដែនាងមិនព្រមបើកហើយក៏ឡើងតាមជណ្ដើរទៅសំងំនៅលើផ្ទះផ្លាស់សំលៀកបំពាក់ ។
ប្រភពដដែលបានបន្ដទៀតថា លុះមួយសន្ទុះក្រោយមកជនសង្ស័យក៏បានឡើងតាមជញ្ជាំងផ្ទះ រួចលូនចូលតាមបង្អួចទៅក្នុងផ្ទះឃើញនាងរងគ្រោះកំពុងផ្លាស់សំលៀកបំពាក់ក៏ធ្វើសកម្មភាពចាប់រំលោភរហូតបានសំរេច និងគំរាមមិនឱ្យនាងស្រែក។ បន្ទាប់មកជននេះ ក៏ចុះពីលើផ្ទះគេចខ្លួនទៅបាត់ស្រមោលរហូតដល់វេលាម៉ោង១២ថ្ងៃត្រង់ថ្ងៃដដែលនោះ ពេលក្រុមគ្រួសារមកដល់ផ្ទះនាងរងគ្រោះបាននិយាយរឿងរ៉ាវប្រាប់ ហើយក្រុមគ្រួសារក៏បានប្ដឹងឱ្យប៉ូលិសចាប់ខ្លួនជននេះតែម្ដង ។
ក្រោយពេលត្រូវចាប់ខ្លួន ជននោះបានសារភាពថា រូបគេពិតជាបានធ្វើសកម្មភាពចាប់រំលោភនាងក្រមុំ ម្នាក់នេះរហូតបានសំរេចមែនដោយសារតែពេលនោះឃើញនាងនៅផ្ទះតែម្នាក់ឯង មានឱកាសល្អក៏នឹកឃើញចង់រួមរ័កហើយក៏ចាប់រំលោភតែម្ដង ។ជនឈ្មោះជួន ប៊ុនធី ត្រូវបានប៉ូលិសឃុំខ្លួនបណ្ដោះអាសន្ននៅផ្នែកព្រហ្មទណ្ឌខណ្ឌដង្កោ ដើម្បីធ្វើការសាកសួរ និងកសាងសំណុំរឿងបញ្ជូនទៅសាលាដំបូង ។
No comments:
Post a Comment